Kabahin sa paningkamot sa gobyerno nga masiguro ang hapsay nga pag-agi sa mga oil tanker sa Strait of Hormuz, gipangunahan ni Department of Foreign Affairs Secretary Maria Theresa Lazaro ug Department of Energy Secretary Sharon Garin ang miting uban sa Iranian Ambassador Yousef Esmail Zadeh.
Sumala ni Lazaro, ang tumong sa pagpulong mao ang pagpalapad sa bilateral nga agenda sa Pilipinas ug Iran, samtang nagdali ang nasud sa pagpangandam sa igo nga suplay sa lana nga magamit hangtod katapusan sa Hunyo.
Gimando ni President Ferdinand Marcos Jr. si Secretary Lazaro nga makig-konekta sa Iran aron masiguro ang walay babag nga pag-agi sa oil tanker sa Strait of Hormuz, ilabi na sa tunga sa nagpabiling tensyon tali sa Iran, Estados Unidos, ug Israel.
Ang Pilipinas usa sa mga nasud nga apektado sa global nga epekto sa kagubot sa Middle East.
Dugang pa usab ni Lazaro nga gisusi nila uban ni Garin ang mga oportunidad sa kooperasyon, ug ang pakig-uban diin nga nagpabilin sa pagpadayon sa momentum gikan sa Philippine-Iran Political Consultations niadtong November 2025, nga nagpalig-on sa commitment sa duha ka nasud sa paghugot sa relasyon sa tanan nga aspeto, ilabi na sa enerhiya.
Sumala ni Palace Press Office Undersecretary Claire Castro, nga gimando ni President Ferdinand Marcos Jr. nga magpahigayun og high-level talks ang gobyerno sa Iran sa taliwala sa kagubot sa Middle East.
Gisiguro usab sa Malacañang n maayo ang relasyon sa Pilipinas ug Iran, nga makatabang sa diplomatic engagement sa duha ka nasud, bisan pa sa hugot nga pagbantay sa Iran sa mga barkong moagi sa Strait of Hormuz tungod sa giyera.