Gihatagan na og opisyal nga awtoridad ang mga barangay tanod o sakop sa Barangay Public Safety Officers (BPSO) sa tanang 46 ka barangay sa Dakbayan sa Malaybalay aron mas gipakusgan ang kampanya batok sa mga gipausab nga tambutso o “bora-bora” ug uban pang paglapas sa balaod sa trapiko.
Sa pakighinabi sa Bombo Radyo kang Liga ng mga Barangay President ug Public Peace and Order Committee Chairman Julius Manghano, iyang gibutyag nga walay pagpahuway ug mas gipahugtan ang maong pagpatuman sa balaod subay sa mando ni Mayor Jay Warren Pabillaran. Matud ni Manghano, tungod sa kanihit sa mga kawani sa Traffic Management Center (TMC) ug kwerpo sa kapolisan, ang mga barangay tanod na ang gitugotan sa pagpahigayon og mga pagsusi sa kadalanan ug magluwat og tiket sa paglapas batok sa mga nagmaneho nga walay lisensya, walay salipod sa ulo o helmet, nagbutang og gidili nga mga suga, ug kadtong naggamit og bora-bora.
Gawas sa trapiko, gipangandaman usab karon sa dakbayan ang hugot nga pagdakop sa mga latagaw nga iro sa tanang kabarangayan aron malikayan ang mga aksidente. Iproseso ug itipig sa City Veterinary Office ang mga madakpang mananap sulod sa tulo hangtod lima ka adlaw aron angkonon ug kuhaon sa ilang mga tag-iya sa wala pa kini ipailalom sa opisyal nga pagpoo.