Gilauman sa Malacañang nga madawat karong semanaha ang opisyal nga rekomendasyon gikan sa Department of Finance (DOF) bahin sa sugyot nga pagpasuspinde sa excise tax sa lana, diin gipaabot ang pinal nga desisyon ni President Ferdinand Marcos Jr. sa sayong bahin sa sunod semana.
Sumala ni Bataan 2nd District Rep. Albert Garcia, budget sponsor sa Buhatan sa Pangulo sa Kamara, mipirma na si Finance Secretary Frederick Go og resolusyon alang sa pagpasuspinde sa excise tax sa LPG ug kerosene lamang. Kini human gipamatud-an sa Department of Energy (DOE) nga miabot na sa $80 kada bariles ang average price sa Dubai crude oil—ang nalatid nga threshold sa balaod aron tun-an ang pagpasuspinde sa buhis sa lana.
Apan, gipahayag sa DOF nga dili sila pabor nga isuspinde ang buhis sa diesel ug gasolina tungod sa gibana-banang ₱12 bilyon nga kawalan sa koleksyon sa buhis kada bulan. Imbes nga tangtangon ang buhis sa gasolina ug diesel, mas iduso sa gobyerno ang paghatag og targeted fuel subsidies alang sa mga tsuper, mag-uuma, ug mangingisda.