Magtiayon nagpayuhot og iligal nga droga, nasikop sa Valencia City!

Nasikop ang magtiayon nga nagpayuhot og iligal nga droga atol sa gikasang drug buy-bust operation sa mga sakop sa Provincial Drug Enforcement Unit-Bukidnon niadtong Pebrero 7 sa gabii didto sa Barangay Lumbo, Valencia City.

Ang mga dinakpan nailang sila si Alyas Abeth, usa ka caretaker og baboyan gikan sa Pangantucan, ug ang kauban niini nga si Alyas Erwin nga residente sa Kadingilan.

Nakuha gikan sa posisyon sa duha ka suspek ang gituohang iligal nga droga human malampusong napatigayon ang transaksyon sa Purok 3A sa maong dapit.

Sa pagkakaron, himas-rehas na ang duha ka maghigala kinsa gipamatud-an nga mag-uban bisan sa lisud nga sitwasyon human sila dungan nga gipangpusasan sa mga otoridad.