Sikat karon sa Kenya si Rogers Olu Maguta, usa ka 27-anyos nga lalaki nga walay permanenteng puluy-anan ug kasagarang makita nga naglakaw sa kadalanan sa Nairobi uban ang mga langgam nga nagtapok sa iyang ulo ug abaga.
Dako nga bahin sa iyang adlaw ang gigahin niini sa pag-atiman sa mga langgam hangtod makabalik na kini sa ilang natural nga puy-anan.
Bisan limitado ra ang iyang pagkaon, andam gihapon kining ipaambit sa iyang mga giatiman nga langgam.
Gitawag siya og “Nairobi Birdman” ug nakadani og dakong interes gikan sa publiko, ilabina niadtong 2025 atol sa dagkong protesta sa Nairobi.
Tungod sa iyang talagsaong hitsura, nga puno sa mga langgam nga anaa sa iyang ulo ug abaga nahimo siyang viral sa social media, apan nakaagom usab siyang target sa kapulisan ug gikulata gamit ang baton.
Sukad pa sa iyang pagkabata, hilig na si Maguta og mga langgam ug kanunay siyang moadto sa Lake Nakuru National Park aron magtan-aw sa mga flamingo, stork, ug black kites.
Apan lima ka tuig na ang milabay, adunay usa ka samdan nga langgam nga miduol kaniya ug iyang gitabangan.
Ginganlan niya kini og Johnson, ug sukad niadto, dili na sila halos magbulag.
Tungod sa iyang pag-atiman, nasayod ang ubang tawo sa iyang kahimtang ug nagsugod sila og hatod og lain pang mga samdan nga langgam ngadto kaniya.
Bisan wala siyay pormal nga kahibalo o training, iya kining giatiman ug gitabangan hangtod makabalik sa kalasangan.
Ang uban niini nagpabilin ug nahimong iyang kauban, nga maoy sinugdanan sa iyang pagkaila isip Nairobi Birdman.
Bisan sa kalisod sa iyang kahimtang, nakakat-on siya pag-atiman sa kapin 20 ka matang sa langgam.
Naglaum si Maguta nga mahimong inspirasyon sa uban pinaagi sa iyang gugma sa kinaiyahan.
Gipaambit usab ni Maguta ang iyang mga kasinatian pinaagi sa TikTok, Instagram, ug Facebook.