Taliwala sa grabeng pagkaylap sa makamatay nga Bundibugyo strain sa Ebola sa Democratic Republic of Congo (DRC), nagpabiling dako nga hagit alang sa mga otoridad ang pagdumili motuo ug kawalay kahadlok sa mga residente sa maong virus.
Ang maong epidemya paspas nga mikaylap sa kasilinganang mga probinsya ug nakaabot na gani sa nasud sa Uganda, hinungdan nga gideklara kini sa World Health Organization (WHO) isip usa ka international emergency.
Sa lungsod sa Mongbwalu nga giilang sentro sa outbreak, natala na ang 88 ka patay gikan sa 322 ka mga gidudahang kaso tungod wala pa’y nadiskobrehang tambal o bakuna alang sa maong matang sa virus.
Tungod sa kakulang sa mga kahimanan sa lokal nga tambalanan, plastic nga balde lamang ang gigamit sa paghugas sa kamot samtang ang mga healthcare workers nagsulob og tibuok-lawas nga hazard suits aron maprotektahan ang kaugalingon.
Sumala sa Doctors Without Borders (MSF), dako ang posibilidad nga mas taas pa ang tinuod nga ihap sa mga nangasakit tungod limitado lamang ang kapasidad sa paghimo og mga laboratory tests sa rehiyon.
Misamot pa ang tulin nga pagkatakod sa virus human mabuak ang lungon sa usa ka biktima samtang gibiyahe kini sa lubakon nga dalan, nga nag-expose sa patay’ng lawas nga puno sa Ebola ngadto sa mga lumulupyo.
Gumikan niini, nanawagan ang mga lokal nga lider sa komunidad nga mag-amping ang tanan dungan sa pagpahayag sa ilang kabalaka batok sa mga nagpakatukaw nga peke ug nagtuo nga “mystical malady” o dili tinuod ang maong sakit.