Gitubag sa Provincial Events Committee Chair sa Bukidnon ang kontrobersiya kalabot na sa natigayong Lechon Festival sa Kaamulan 2026.
Giklaro ni Jun Cruz, ang Chairman Provincial Events Committee, nga ang maong aktibidad gidumalaan sa Agriculture Office kauban ang mga partisipante sa Local Government Units (LGUs).
Sa pakighinabi sa Bombo Radyo Malaybalay, gibutyag niini nga duna nay direktiba gikan sa gobernador aron sutaon ang maong isyu human kini mabatikos sa social media tungod sa giingong paglapas sa kultura sa pito ka tribu sa Bukidnon.
Bisan pa sa maong mulo, gipasabot sa opisyal nga sa kinatibuk-an, nagpabiling madayandayanon, organisado, ug malampuson ang gipahigayon nga street dancing competition uban ang hapsay nga seguridad.
Sa pagkakaron, gipaubos na sa saktong pagsusi ang maong insidente samtang padayon ang pag-awhag sa publiko nga suportahan ang nahibiling mga kalingawan sa festival, lakip na ang mga konsyerto sa Capitol Grounds.