Plano ni Senate President Pro Tempore ug Blue Ribbon Committee Chairperson Panfilo “Ping” Lacson nga pag-atbangon sa pagdungog sa Senado si kanhi Speaker Martin Romualdez, kanhi Ako Bicol Party-list Representative ug puganteng si Zaldy Co, ug ang 18 ka indibidwal nga nagpaila nga kanhi mga sundalo, nga may kalabotan sa giingong anomalya sa flood control projects.
Sumala ni Lacson, padayon nilang imbitahon si Romualdez samtang adunay mga impormasyong naglambigit kaniya ug gikinahanglan ang iyang partisipasyon sa imbestigasyon.
Gipasiugda usab sa senador nga importante nga mag-atubang silang tanan sa usa ka hearing aron matugkad ug mapagtandi ang ilang mga pahayag ug mahibal-an kung kinsa ang nagsulti sa tinuod.
Kahinumduman nga si Zaldy Co giingong adunay dakong papel sa giingong korapsyon nga naglambigit kang Romualdez nga giakusahan usab nga mastermind sa anomalya sa flood control projects.
Konektado usab kini sa mga pahayag sa 18 ka kanhi sundalo nga miingon nga sila maoy nagdeliver og mga maleta nga puno sa kwarta ngadto sa balay ni Romualdez sa mando ni Co.
Samtang, matud ni Lacson nga giandam na niini ang Chairman’s Progress Report kabahin sa flood control scandal aron magamit sa sunod nga pagdungog ug makatabang sa paghimo og mga kaso nga ipasaka sa Department of Justice ug Office of the Ombudsman batok sa mga nalambigit.
Ibutyag sa maong report ang mga nakit-an sa partial committee report lakip ang mga ebidensya nga nakolekta isip attachments aron makatabang sa imbestigasyon sa mga ahensya.
Gipadayag usab ni Lacson nga bukas siya sa posibilidad nga adunay dugang nga mga senador nga mopirma sa partial committee report aron kini mahisgutan sa plenaryo ug posibleng maamyendahan ug maaprobahan.
Sa katapusan, gipasiugda sa senador nga sundon sa Blue Ribbon Committee ang ebidensya bisan pa og moabot kini sa labing taas nga opisyal sa nasud.
Apan, gipatin-aw niini nga sa pagkakaron wala pay gibug-aton ang mga alegasyon ni Co batok sa Presidente gumikan wala kini gihimo ubos sa panumpa.