Natigayun ang usa ka makulay ug talagsaong kalihokan sa Poland human nakab-ot sa usa ka grupo sa hair experts ang Guinness World Record alang sa “most heads of hair dyed by a team in 8 hours.”
Sa kinatibuk-an, 243 ka indibidwal ang nahumanan og bag-ong kolor sa buhok atol sa maong kalihokan.
Natigayon ang world record attempt sa LOOK & beautyVISION, usa sa labing importante nga hair ug beauty events sa Europe, nga gipangunahan sa Fale Loki Koki, usa ka iladong wholesaler sa hairdressing supplies sa Poland.
Pinaagi sa ilang kalampusan, nalabwan nila ang miaging record nga 221 ka ulo nga natala sa Shanghai, China.
Sa kompetisyon, gitukod ang 80 ka work stations alang sa mga hairdresser, diin kadaghanan nagdala sa ilang kaugalingong mga modelo sama sa pamilya ug mga higala.
Sumala sa mga report, ang labing popular nga kolor nga gipili mao ang copper ug nagkalain-laing shades sa red, samtang adunay uban nga mipili usab og mas hayag nga kolor sama sa pink ug blue.
Human sa walay hunong nga pagtina sa buhok sulod sa walong oras, opisyal nga gihatag ni Guinness World Records adjudicator Carl Saville ang sertipiko sa Fale Loki Koki isip pag-ila sa ilang bag-ong world record.