Nabalhog sa prisuhan ang upat ka mga drug suspects human nasakmit ang kapin ₱99,000 nga balor sa gidiling tambal nga shabu diha sa managlahing buy-bust operations sa lalawigan sa Bukidnon.
Subay sa taho ni Bukidnon Police Provincial Office (BukPPO) Director PCOL Oliver Sotto Navales, unang nasikop sa Barangay Poblacion, Pangantucan ang usa ka 25-anyos nga alyas “Dondon” nga nakuhanan og 3.58 gramo sa shabu nga nagkantidad og ₱24,344.
Nasundan kini sa pagkadakop sa usa ka 40-anyos nga lalaki sa Barangay Kisolon, lungsod sa Sumilao diin nakumpiska gikan kaniya ang ₱1,496 nga balor sa droga, samtang duha pa ka lalaki nga nag-edad 32 ug 50 anyos ang nadakpan sa Barangay Poblacion, lungsod sa Quezon diin nakumpiska gikan kanila ang 10.8 gramo sa shabu nga nagkantidad og ₱73,440.
Mag-atubang ug ginaandam na ang pormal nga kaso batok sa mga suspek sa paglapas sa Republic Act 9165 o Comprehensive Dangerous Drugs Act of 2002, samtang ang mga nakumpiskang ebidensya gidala na sa Bukidnon Provincial Forensic Unit alang sa pagsusi.