Mokabat sa ₱92.8 milyon ang gigahin alang sa socio-civic projects sa 464 ka barangay sa Bukidnon, diin gilauman nga makabenepisyo ang 2,320 ka Presidential scholars ubos sa Presidential Scholarship Program.
Matag kwalipikadong scholar sa matag barangay makadawat og ₱20,000 nga ayuda alang sa ilang mga panginahanglanon sa pag-eskwela, isip suporta sa gobyerno aron mapadayon nila ang ilang pagtuon bisan pa sa mga hagit pinansyal.
Gipasalig ni Executive Secretary Ralph Recto nga magpadayon ang Presidential Scholarship Program isip kabahin sa paningkamot sa administrasyon nga mapalapdan ang access sa edukasyon ug matabangan ang mga estudyanteng nanginahanglan og pinansyal nga suporta.
Gihisgutan usab ni Recto ang Presidential Merit Award Scholarship, nga sumala kaniya nakabenepisyo na sa kapin 40,000 ka scholars.
Ang mga kwalipikadong benepisyaryo mahimong mopili sa ilang gusto nga kurso, lakip ang oportunidad nga makapadayon sa pagtuon sa gawas sa nasod, basta mapadayon nila ang ilang maayong academic performance.
Samtang, gipasalig usab ni Recto nga padayon ang pagpondo alang sa pagkompleto sa Bukidnon Airport sa Don Carlos.
Kapin ₱300 milyon ang gitagana sa proposed budget alang sa sunod tuig aron ipadayon ang proyekto.
Target nga makompleto ang airport sa unang quarter sa 2027, apan posibleng madugangan pa og tulo ka bulan ang construction timeline. Gilauman nga mahimong operational na ang Bukidnon Airport sulod sa 2027.
Gipasalamatan ni Recto ang katawhan sa Bukidnon tungod sa ilang padayong suporta ug giila ang airport isip usa sa mga flagship projects sa gobyerno nga gilauman nga makahatag og dugang nga oportunidad sa ekonomiya ug konektibidad, ilabi na sa Northern Bukidnon.