Mukabat sa dul-an P10-M nga balor sa kontrabando ang nakumpiska sa Police Regional Office 10 o PRO 10 atol sa usa ka semana nga operasyon batok kriminalidad ug ilegal nga mga kalihokan sa Northern Mindanao.
Gikan Agosto 27 hangtUd Septiyembre 2, ning kasamtangang tuig, nakasikop ang PRO 10 og 304 ka mga indibidwal, lakip ang 245 ka wanted persons, ug nakumpiska ang mga kontrabando nga mokabat sa P9.16 milyon.
Sa kampanya batok ilegal nga droga, 51 ka mga indibidwal ang nadakpan sa 42 ka operasyon, diin nakumpiska ang kapin 353 gramos nga shabu, unom ka tanom sa marijuana ug 0.5 gramos nga uga nga marijuana nga mokabat sa P2.4 milyon ang standard drug price.
Samtang, 48 ka mga indibidwal ang nadakpan sa kampanya batok ilegal nga sugal, samtang 21 ka armas ang nakumpiska, nabawi o boluntaryong gitugyan sa mga otoridad.
Nakumpiska usab ang mineral ores ug heavy equipment nga mokabat sa P297,500 sa kampanya batok ilegal nga pagmina.
Labing dako sa mga nakumpiska ang kontrabando nga sigarilyo nga mokabat sa P6.45 milyon, atol sa 32 ka operasyon batok cigarette smuggling, diin usa ka suspek ang nadakpan.