Gikalingawan sa social media ang usa ka farm goat nga ginganlan og “Billy Goat” tungod sa talagsaong kinaiya niini. Makita sa usa ka video nga naghuyop kini og kalayo sa lutoan sama sa gibuhat sa mga tawo, nga nakapahingaha sa mga netizen.
Sumala sa tag-iya sa maong kanding, gipadako si Billy Goat sa ilang caretaker nga si Bobong, kuyog sa mga iro sa ilang umahan. Tungod niini, naangkon na sa kanding ang kinaiya sa iyang mga kaubang iro.
Gawas nga ganahan kini mokaon og kan-on imbes nga sagbot lang, nagtuo na usab ang maong hayop nga usa kini ka iro.
Gani, mas gusto ni Billy Goat nga makig-uban sa mga iro kaysa sa iyang mga kaubang kanding.
Tungod niining makalingaw nga sitwasyon, nagkomento ang tag-iya nga tingali kinahanglan na nila ipakita si Billy Goat sa samin aron makaamgo kini nga usa siya ka kanding ug dili iro.