Gitun-an sa Association of Southeast Asian Nations (ASEAN) ang panukalang joint oil stockpiling aron maandam ang rehiyon sa posibleng kakulangon sa suplay sa lana tungod sa krisis sa Middle East ug kagubot sa Strait of Hormuz.
Sumala kang ASEAN Spokesperson Dominic Xavier Imperial, giaprobahan na sa mga lider sa ASEAN ang pagtuon sa maong mekanismo atol sa summit niadtong Mayo. Gilauman nga mahuman sa mga hingtungdang ahensya ang pagtuon aron mahimong basihan sa sunod nga mga lakang.
Gipahibalo usab ni Imperial nga lima na ka miyembrong nasud ang nakaratipika sa kasabutan ubos sa ASEAN Petroleum Security Agreement (APSA), diin ang Pilipinas ang unang mipirma sa ratipikasyon.
Samtang, lakip usab sa hisgotanan sa ASEAN-China Summit ang pagpatuman sa upgraded ASEAN-China Free Trade Area o ACFTA 3.0 aron dugang mapalig-on ang kooperasyon sa ekonomiya ug kalakalan tali sa duha ka partido.
Sa laing bahin, miabot na sa Pilipinas si Brazilian President Luiz Inácio Lula da Silva alang sa duha ka adlaw nga state visit gikan Nobyembre 14 hangtod 15, diin hisgotan nila ni Pangulong Ferdinand Marcos Jr. ang pagpalig-on sa kooperasyon sa pamatigayon, agrikultura, enerhiya ug depensa.

