Hingpit nga agpagawas og lig-on nga pamahayag si Iran Parliament Speaker Mohammad Bagher Ghalibaf human sa iyang pagbalik gikan sa Pakistan diin mao ang nangulo sa negosasyon alang sa peace talks tali sa Iran ug Estados Unidos.
Isip tubag sa mga bahad ni U.S. President Donald Trump, gipasiugdahan ni Ghalibaf nga ang maong mga hulga walay epekto sa mga Iranian ug dili sila mapugos sa pag-surender ubos sa pagpanghadlok.
Sumala sa mga taho gikan sa Iranian outlets, andam ang Iran nga motubag sa bisan unsang pasidaan sa Amerika diin gipahayag niini nga sanglit makig-away ang U.S., andam ang nasud sa Iran nga makigbatok, apan kon moduol kini pinaagi sa lohika, tubagon usab nila kini sa lohikal nga paagi.
Dugang pa ni Ghalibaf, dili magpadala ang Iran sa bisan unsang hulga ug kon sulayan pag-usab ang ilang determinasyon, tudloan nila ang Amerika og mas dako pa nga leksyon. Gihisgotan usab niini nga sukad pa sa sinugdanan, wala na’y pagsalig ang Tehran sa Estados Unidos tungod sa mga gihimong pag-atake sa Iran samtang nagpadayon ang negosasyon.
Sa pikas bahin, mipahayag si Trump pinaagi sa Truth Social nga ipatuman sa Estados Unidos ang usa ka naval blockade sa Strait of Hormuz aron babagan ang mga barko nga nagbayad og giingong “illegal toll” ngadto sa Iran.
Matud pa sa Presidente, padayon usab nga limpyohan sa U.S. ang mga dunggoanan sa maong dapit aron maseguro ang luwas nga pag-agi sa mga barko sa ilang mga kaalyado.
Una na usab nga miingon ang militar sa Amerika nga andam sila nga mopahigayon og operasyon batok sa Iran sa saktong panahon, samtang nagpabiling tensyonado ang sitwasyon tungod sa wala pa’y nakab-ot nga kasabutan mahitungod sa nuclear program sa Iran.