Naghiusa ang Department of Justice (DOJ), Presidential Communications Office (PCO), ug Department of Information and Communications Technology (DICT) aron ilusad ang “Oplan Contra Fake News”, usa ka bag-ong programa batok sa pagpakatap sa sayop nga impormasyon online.
Pinaagi sa maong inisyatibo, mipirma ang mga pangulo sa tulo ka ahensya og Memorandum of Agreement aron mapalig-on ang koordinasyon ug pagtukod og usa ka whole-of-government approach batok sa fake news, misinformation, disinformation, ug AI-generated deepfakes.
Matud ni Justice Secretary Fredderick Vida, delikado ang padayon nga pagkatap sa sayop nga impormasyon gumikan makaguba kini sa pagsalig sa publiko, makalibog sa panahon sa krisis, ug hinungdan og pagkabahin-bahin sa katawhan.
Samtang gipunting ni Presidential Communication Office Sec. Dave Gomez nga ang programa dili lang puro saad kondili tinuod nga aksyon aron mapanalipdan ang katungod sa mga Pilipino sa sakto nga impormasyon ug kagawasan sa pagpahayag.
Gipunting usab ni Department of Information and Communications Technology Sec. Henry Rhoel Aguda nga responsibilidad sa gobyerno ang pagpanubag sa mga nagpakaylap og sayop nga impormasyon online.
Sa kinatibuk-an, tumong sa “Oplan Contra Fake News” nga mapalig-on ang tukmang impormasyon ug maprotektahan ang publiko batok sa digital misinformation.