Wala magpapugong ang nasod sa Iran ug nipahigayon hinuon og serye sa mga bag-ong missile ug drone attacks sa tibuok Middle East niadtong Lunes, Abril 6, 2026.
Kini human nipagawas og hait ug puno sa balikas nga ultimatum si US President Donald Trump nga nagmando sa Tehran nga ablihan pag-usab ang Strait of Hormuz, o kon dili, atubangon nila ang “impiyerno” pinaagi sa pagguba sa ilang mga power plant ug mga tulay.
Ang mga pag-atake sa Iran niigo sa mga dapit sa Israel, Kuwait, ug United Arab Emirates (UAE). Samtang nagpadayon ang tensyon, nipahimangno usab ang militar sa Iran nga mobalos sila og mas “makalilisang” nga retaliasyon kon tinuoron sa Amerika ang bahad niini sa pag-atake sa mga civilian infrastructure.
Sa pagkakaron, gikatakda ni Trump ang deadline sa Martes sa alas-8 sa gabii (Eastern Time) alang sa Iran nga motuman sa iyang mga demanda, samtang ang tibuok kalibutan gikulbaan sa posibleng dugang pag-ulbo sa gubat nga nakapaambak na sa presyo sa lana sa merkado.