Hugot nga gipatuman sa Department of Trade and Industry (DTI) Bukidnon ang pagmonitor sa mga presyo sa mga palaliton uban sa pakig-alayon sa Local Price Coordinating Councils (LPCC) sa tibuok probinsya.
Tumong niini nga maprotektahan ang mga konsumidor batok sa iresponsableng pagsaka sa presyo sa mga batakang palaliton (basic necessities) ug prime commodities.
Sa pakighinabi sa Bombo Radyo Malaybalay kang Junar Merla, ang Chief sa Consumer Protection Division sa DTI-Bukidnon, iyang gibutyag nga gipakusgan nila ang koordinasyon sa mga lokal nga kagamhanan aron masiguro ang striktong pagsunod sa Suggested Retail Price (SRP).
Sa gihimong inspeksyon sa nagkalain-laing lugar ning lalawigan, pipila ka mga grocery store ang nasuta nga posibleng nakalapas sa gitakda nga Suggested Retail Price (SRP) sa mga produkto nga ubos sa hurisdiksyon sa DTI.
Hinuon, gi-andaman na sa buhatan og Letter of Inquiry (LOI) ang maong mga establisimento aron mohatag og pormal nga katin-awan ug katarungan kon ngano nga mas taas ang ilang presyo kumpara sa SRP.
Matud ni Junar Merla, ang Chief sa Consumer Protection Division, gipailalom pa sa hugot nga validation ang maong mga tindahan sa dili pa pormal nga i-isyu ang maong mga suwat.Â
Subay niini, nasayran usab nga kapin 200 ka mga produkto ang duna’y SRP nga epektibo hangtod karong Mayo 15. Subay niini, giawhag sa DTI ang publiko nga mag-canvas una sa presyo ug sigurohon ang PS o ICC mark sa mga palitonon.
Nanawagan usab ang buhatan sa mga konsumidor nga i-report dayon ang mga establisemento nga nagpahimulos ug nagbaligya og sobra sa gitakdang presyo.