Mideklarar ang militar sa Russia og usa ka unilateral ceasefire o temporaryong paghunong sa pagpangatake sa Ukraine sugod karong Mayo 8 hangtod Mayo 9, 2026.
Matod sa Department of Defense sa Russia, ang maong lakang gimando ni Presidente Vladimir Putin aron hatagan og dalan ang selebrasyon sa Victory Day, ang ika-81 nga kasumaran sa kadaogan sa Soviet Union batok sa Nazi Germany niadtong World War II. Gihangyo usab sa Russia ang Ukraine nga mosunod sa maong ceasefire alang sa kalinaw sa maong mga petsa.
Apan, nagpagawas og pasidaan ang Moscow nga kon mosulay ang Ukraine sa pagdisturbo sa ilang selebrasyon o maglunsad og mga drone attack, mobalos sila pinaagi sa usa ka “massive missile strike” sa sentro sa Kyiv. Gani, gipahimangnoan na ang mga sibilyan ug mga diplomat sa pagbiya sa maong dapit alang sa ilang seguridad.
Sa pikas bahin, ang Ukraine mideklarar usab og kaugalingon nilang ceasefire sugod karong Mayo 5 hangtod Mayo 6, dungan sa pag-ingon nga dili sila seryoso sa hangyo sa Russia tungod sa nagpadayon nga tensyon.