Miabot na sa kapin 50 ka insidente sa grass ug forest fires ang narekord sa City Environment and Natural Resources Office (City ENRO) sa dakbayan sa Malaybalay nga posibleng makadaot sa 35,000 ka ektaryang kalasangan.
Sa pakighinabi sa Bombo Radyo Malaybalay, gibutyag ni Dr. Jessie Suson nga ang maong mga sunog narekord gumikan sa grabeng kainit sa panahon sa miaging mga adlaw. Hinuon, daling napalong ang kalayo sulod lamang sa usa ka adlaw pinaagi sa paspas nga aksyon sa mga forest fire fighters, hinungdan nga wala na kini nakahatag og mas dakong kadaot.
Bisan pa man og miundang ang mga pag-ulbo sa kalayo tungod sa mga pag-ulan, nagpabiling full alert ang mga otoridad. Gipahimangnoan ni Suson ang publiko nga likayan ang mga iresponsableng lihok sama sa pagluto sa bukid, paglabay sa upos sa sigarilyo, ug tinuyo nga pagsunog. Nanawagan usab siya og kooperasyon sa komunidad tungod kay ang pagpanalipod sa kinaiyahan responsibilidad sa matag usa.