Gipahayag ni Atty. Sonny Matula, presidente sa Federation of Free Workers, nga “pait nga pahiyom” lamang ang madawat sa sektor sa mga trabahante, niadtong milabayng Labor Day tungod sa kakuwang sa aksyon sa gobyerno sa ilang mga mulo.
Sa pakighinabi sa Bombo Radyo Malaybalay, gibutyag ni Matula nga dako ang ilang dismaya tungod kay sulod sa halos upat ka tuig nga paglingkod ni Presidente Ferdinand Marcos Jr., wala pa gihapoy konkretong tubag sa ilang gipangayo nga umento sa suholan. Gawas sa sweldo, giduso usab sa maong sektor ang pagtangtang sa excise tax ug VAT sa petrolyo aron maibsan ang inadlaw nga gasto sa mga trabahante, dungan sa sugyot nga pahamtangan og “wealth tax” ang mga bilyonaryo sa nasud.
Gikasubo usab sa lider-manggagawa nga hangtod karon, wala pa gyud makig-dayalogo ang Pangulo kanila aron madungog ang ilang mga hinaing. Nanawagan ang sektor nga hatagan sila og higayon nga direktang mapadangat ang ilang mga solusyon ngadto sa Palasyo alang sa kaayuhan sa tanang trabahante sa nasud.