Patay ang usa ka 18-anyos nga dalaga human kini nagkutlo sa kaugalingong kinabuhi pinaagi sa pagbitay sa sanga sa mangga sa luyo sa panimalay sa iyang iyaan niadtong kagahapong adlawa, Mayo 5, 2026, sa Purok 7, sa Dologon, Maramag, Bukidnon.
Sa pakighinabi sa Bombo radyo kang PLTCOL Alexander E. Eugenio, Chief of Police sa Maramag Municipal Police Station, gibutyag niini nga bisan ang mga ginikanan sa biktima wala masayod sa lawom nga rason kon ngano’ng nahimo kini sa ilang anak.
Nasayran nga ang maong batan-on nagtrabaho kaniadto sa iyang iyaan sa dakbayan sa Valencia.
Apan sa wala pa ang insidente, nakit-an sa iyang social media account ang mga post nga naghisgot mahitungod sa pagtapos sa iyang kaugalingong kinabuhi, nga nagsilbing “indication” nga nag-atubang kini og problema.
Dugang pa sa opisyal, walay nakitang foul play sa maong insidente. Sa gihimong imbestigasyon sa kapulisan nasuta nga walay nakit-ang bisan unsang timailhan sa pagpasakit o samad sa lawas sa biktima, gawas sa marka sa liog niini.
Gibutyag usab ni Eugenio nga usa ka belt nga gama sa sako ang gigamit sa batan-on sa maong insidente.