MALAYBALAY CITY – Tingkagol na sa prisuhan ang giilang Top 3 Most Wanted Person sa Regional Level human kini masikop sa mga otoridad sa Barangay Sumpong, ning dakbayan, niadtong Mayo 4.
Naila ang dinakpan nga si Felimon Boiser Guiroy, 20-anyos, usa ka laborer ug residente sa maong dapit. Gisilbi sa Malaybalay City Police Station ang Warrant of Arrest batok sa suspek alang sa mga seryosong krimen nga Qualified Rape sa menor de edad ug paglapas sa Republic Act 7610 o ang Child Abuse Law.
Gikabutyag sa mga otoridad nga walay piyansa nga gitakda ang korte alang sa temporaryong kagawasan sa suspek gumikan sa kabug-aton sa iyang gikaatubang nga mga kaso. Sa pagkakaron, gidetiner na ang dinakpan sa Malaybalay CPS alang sa dokumentasyon sa dili pa kini itugyan ngadto sa husgado nga nagpagawas sa maong warrant.