MALAYBALAY CITY – Sikop ang usa ka 39-anyos nga lalaki human malampusong gipahigayon ang usa ka buy-bust operation batok sa ilegal nga droga sa lungsod sa Impasugong, Bukidnon, niadtong Mayo 5.
Sa report gikan sa kapulisan, natigayon ang operasyon alas-10:07 sa gabii nga miresulta sa pagkasikop sa suspek ug pagkakumpiskar sa kapin siyam ka sachet ug usa ka pakete sa gituohang shabu. Gawas sa maong substansiya, nakuha usab sa posisyon sa suspek ang nagkadaiyang drug paraphernalia sama sa improvised pipe, aluminum foil, ug cellphone.
Nasayran nga ang nasakmit nga droga duna’y gibug-aton nga 0.79 gramos ug gibanabanang nagkantidad og kapin P5,000. Sa pagkakaron, ang suspek ug ang mga ebidensya anaa na sa kustodiya sa Impasugong Municipal Police Station samtang giandam na ang kasong paglapas sa Republic Act 9165 o Comprehensive Dangerous Drugs Act of 2002 batok sa dinakpan.