Gikataho nga gidakop sa Iran ang duha ka barko sa Strait of Hormuz niadtong Miyerkules, sumala sa semi-official nga Tasnim News Agency, taliwala sa nagpadayon gihapon ang tensyon sa rehiyon ug wala pa klaro ang kahimtangan sa ceasefire negotiations.
Sumala sa report, gibabagan sa Islamic Revolutionary Guard Corps ang duha ka barko tungod sa giingong maritime violations ug gidala kini sa baybayon sa Iran.
Kini mao ang unang report sa aktuwal nga pagdakop og barko sukad nagsugod ang panagbangi.
Samtang, sumala sa usa ka British maritime security agency nga adunay tulo pa ka barko nga gipusil sa maong dalan sa lana, nga usa sa labing importante nga shipping route sa kalibutan.
Taliwala sa kagubot, sumala ni U.S. President Donald Trump nga temporaryong gihunong ang plano sa pag-atake batok sa Iran human matud pa nangayo og panahon ang mga mediator gikan sa Pakistan, bisan pa man nga wala pa klaro kung kanus-a magpadayon pag-usab ang peace talks.
Bisan pa niini, gipasiugda ni Trump ang padayon nga presensya sa U.S. naval blockade batok sa mga barko sa Iran.
Sa laing bahin, giingon sa Iran nga ilang giisip ang blockade isip “act of war” ug nagpasidaan nga dili nila ablihan ang Strait of Hormuz samtang nagpadayon ang giingong pagpangipit sa Amerika.
Dugang pa, giulat usab nga adunay mga buto sa pusil nga nadungog sa pipila ka barko sulod sa strait, lakip ang mga container ships nga giingong giatake samtang naglabay sa lugar.
Wala pay naiulat nga namatay sa maong mga insidente.
Samtang niini, nagpabilin nga dili klaro ang direksyon sa peace talks sa Islamabad human kuno wala madayon ang gipaabot nga miting sa mga delegasyon sa U.S. ug Iran, taliwala sa padayon nga panaglalis bahin sa nuclear program sa Tehran ug kontrol sa Strait of Hormuz.