Misaka na ngadto sa 40 ang kinatibuk-ang ihap sa mga namatay sa pagkalunod sa MV Trisha Kerstin 3 human narekober ang tulo pa ka lawas sa kadagatan sa Basilan kaaneha sa buntag, Pebrero 1, 2026.
Sumala sa taho gikan sa Philippine Coast Guard (PCG) ug sa Basilan Provincial Disaster Risk Reduction and Management Office (PDRRMO), ang tulo ka mga biktima narekober sa mga sakop sa Hadji Muhtamad local government unit (LGU).
Ang maong mga lawas gidala na sa Zamboanga City alang sa pormal nga identification procedure.Base sa pinakaulahing data dunay naluwas nga 316 samtang padayon pa ang pag-verify sa saktong gidaghanon sa mga missing tungod sa mga discrepancy sa passenger manifest sa barko.Ang MV Trisha Kerstin 3, nga gipanag-iya sa Aleson Shipping Lines, nalunod niadtong Enero 26 samtang naglawig gikan sa Zamboanga City paingon sa Jolo, Sulu.
Giingong gisudlan og tubig ang lower deck sa barko tungod sa dagkong balod duol sa Baluk-Baluk Island, hinungdan sa paspas nga pagtakilid niini.Tungod sa hitabo, gipailalom sa “preventive suspension” sa Maritime Industry Authority (MARINA) ang tanang mga barko sa Aleson Shipping Lines samtang nagpadayon ang lapad nga imbestigasyon.
Ginasusi karon sa mga awtoridad ang posibilidad sa overloading, karaan nga kondisyon sa barko ug ang kapakyas sa pag-alerto sa mga pasahero sa wala pa kini hingpit nga naunlod.Nagpadayon usab ang search and retrieval operations sa mga technical divers sa PCG sa giladmon nga moabot og 76 metros, bisan pa man sa hagit sa kusog nga balod sa dagat.