Nasikop sa kapulisan ang Top 4 ug Top 6 Most Wanted Persons sa lebel-probinsya sa Bukidnon atol sa managlahing operasyon nga gikasa sa lungsod sa Quezon ug Cabanglasan niadtong milabayng adlaw..
Unang nasikop sa Quezon ang Top 4 provincial fugitive human gisilbi kaniya ang warrant of arrest didto sa Sitio Sita, Barangay Santa Felomina, alang sa mga kasong murder (nga walay piyansa) ug attempted murder nga adunay girekomendang piyansa nga P100,000.
Sa pikas bahin, nasikop usab sa Cabanglasan ang Top 6 provincial most wanted gumikan sa kasong pagpanglugos diin hingpit sab nga walay piyansa nga gitakda ang korte. Ang maong suspek giila nga mao sab ang numero unong wanted sa maong lungsod.
Anaa na karon nakatingkagol sa selda sa Quezon ug Cabanglasan Municipal Police Stations ang duha ka mga dinakpan alang sa saktong dokumentasyon samtang nagpaabot sa sunod nga proseso sa korte.