Gikuwestiyon sa human rights lawyer nga si Attorney Dino De Leon ang kredibilidad sa 18 ka nagpailang ex-Marines nga mitestigo sa Senate Blue Ribbon Committee kalabot sa giingong anomalya sa flood control projects.
Matud sa abogado, daghan sa mga testigo ang adunay kuwestiyonableng background, lakip na ang uban nga wala’y record sa Armed Forces of the Philippines ug ang uban giingong na-discharge tungod sa disiplina o kasaypanan sa serbisyo.
Gipunting usab niini nga gubot ug dili konsistent ang ilang testimonya bahin sa giingong bilyon-bilyong kickbacks nga gisulod sa mga maleta ug giingong gihatod sa mga opisyal sa gobyerno.
Dugang pa ni De Leon nga murag gi-coach o gi-script ang mga testigo tungod sa paagi sa pag-interoga ug sa ilang mga tubag, nga nakaapekto sa ilang kredibilidad isip witnesses.
Sa iyang pamahayag, gipasiugda sa abogado nga ang paggamit og leading questions ug posibleng rehearsed nga testimonya makapahuyang sa integridad sa imbestigasyon ug makapahisalaag sa proseso sa pagpangita sa kamatuoran.