Fiji nagdeklara og national emergency tungod sa pagsaka sa kaso sa HIV

Gideklara sa gobyerno sa Fiji ang national emergency tungod sa padayon nga pagsaka sa mga kaso sa human immunodeficiency virus o HIV sa nasud.

Base sa mga datos, mokabat na sa usa sa matag 60 ka hamtong sa Fiji ang natakdan sa HIV, tandi sa usa sa matag 167 ka hamtong lima ka tuig ang milabay.

Misaka usab ang gidaghanon sa mga masuso nga namatay tungod sa mga komplikasyon nga may kalabotan sa HIV.

Lakip sa mga hinungdan nga gilangkuban sa pagsaka sa kaso mao ang paggamit og ilegal nga droga, dili luwas nga pakighilawas, pagpaambit og dagom, ug ang gitawag nga “bluetoothing.”

Tungod niini, gipalapdan sa Fiji ang HIV testing, treatment ug prevention services aron mapugngan ang dugang pagkatag sa virus.