Nagpasidaan ang usa ka ekonomista sa posibleng “worst times” o mas lisod nga panahon sa nasod dungan sa pagsaka sa inflation rate ngadto sa 4.1% niadtong Marso ug ang padayong paghinay sa pagtubo sa ekonomiya.
Sa pakighinabi sa Bombo Radyo Malaybalay, gibutyag ni Ray Talimio Jr., kanhi miyembro sa Oro Chamber-Economic Development Committee RDC-X, nga dako ang posibilidad nga padulong sa stagflation ang Pilipinas. Ang stagflation usa ka kahimtang diin paspas ang pagsaka sa presyo sa mga palaliton samtang naghinay o “stagnant” ang paglambo sa ekonomiya.
Matod ni Talimio, gikan sa 7% GDP growth niadtong 2022, kini mikunhod ngadto sa 6% sa 2023, 5.7% sa 2024, ug 4.4% sa 2025. Posible pa matod pa nga moubos kini sa 4% sa unang quarter sa 2026—usa ka senyales sa mas bug-at nga kalisod alang sa mga ordinaryong Pilipino.
Gisuportahan kini sa pinakabag-ong datos diin ang inflation sa nasod misaka sa 4.1% niadtong Marso 2026, ang pinakataas sukad Hulyo 2024. Nag-unang hinungdan niini mao ang pagsaka sa pletehan ug transport costs tungod sa global oil shock.
Gipasabot ni Talimio nga bisan walay direktang fuel shipment ang Pilipinas gikan sa Strait of Hormuz, apektado gihapon ang nasod tungod kay ang atong suplay sa refined fuel naggikan sa Singapore, Indonesia, Malaysia, Japan, ug South Korea. Ang “Big 3” oil companies sama sa Petron, Shell, ug Chevron (Caltex) nagpalit sa ilang mother companies sa maong mga nasod diin daan na usab nga misaka ang presyo sa lana.
Tungod niini, nagpasidaan si Talimio nga posibleng magpabilin sa ₱100 level ang presyo sa lana sulod sa mosunod nga 6 hangtod 8 ka bulan, nga magpadayon sa pagpaatros sa ekonomiya sa nasod.