Gilauman ni international lawyer Antonio “Tony” Laviña nga posibleng ma-uyog ug mailisan ang liderato sa Senado sa bisan unsang higayon samtang nagpadayon ang pag-convene niini isip usa ka impeachment court batok kang Bise Presidente Sara Duterte.
Sa pakighinabi sa Bombo Radyo Malaybalay, gibutyag ni Laviña nga usa na lamang ka boto ang gikinahanglan karon aron mabalitok ang mayorya sa Senado, hinungdan nga dako ang tsansa nga mapulihan ang kasamtangang Senate President sa taliwala sa krusyal nga proseso.
Dugang sa eksperto, bisan pa man og adunay posibilidad nga mosang-at og mosyon ang depensa aron i-dismiss ang kaso, kulang pa ang suporta aron mapasar kini. Gitataw ni Laviña nga kritikal ang umaabot nga impeachment trial alang sa presentasyon sa mga ebidensya ilabina sa isyu sa mga bank accounts, ug bisan wala pa sa pagkakaron ang gikinahanglang napulo’g unom (16) ka boto aron ma-convict ang Bise Presidente, dako ang kahigayonan nga mausab pa kini depende sa kalig-on sa mga dokumento nga mabasura o mapresentar sa unahan.