GERMANY — Nakasungkit na usab og bulawang medalya ang Pinoy pole vaulter nga si Ernest John “EJ” Obiena human mangibabaw sa Halberstädter Höhenflug – 1st International Pole Vault Meeting nga gihimo sa Halberstadt, Germany.
Nakuha ni Obiena ang kampyonato human niya nalampasan ang gihabogon nga 5.76 meters sa iyang unang pagsuway pa lang, taliwala sa siyam ka mga nakatigi nga atleta sa maong kompetisyon.
Nalupig sa Pinoy athlete si Seifeldin Abdelsalam sa Qatar nga nakuha ang silver medal sa marka nga 5.66m, samtang naangkon ni Cole Walsh sa Estados Unidos ang bronze medal sa gihabogon nga 5.56m.
Kini na ang ikatulo nga bulawang medalya ni Obiena alang sa iyang outdoor season karong tuiga—kasunod sa iyang mga kadaugan sa Austria ug Poland—nga nagpamatuod sa iyang kalibre isip usa sa mga nag-unang pole vaulter sa tibuok kalibutan.