Gipadayag sa P-Pop supergroup nga SB19 ang ilang dakong pasalamat human nakaukit sa kasaysayan sa Lollapalooza 2026 sa Chicago, USA, diin sila ang kinaunahang Filipino act nga nakaperform sa maong iladong international music festival.
Pinaagi sa ilang opisyal nga post sa Instagram, gibutyag sa grupo—nga gilangkoban nilang Pablo, Josh, Stell, Ken, ug Justin—nga wala sila magdahom nga makatungtong ug makarepresentar sa nasod sa ingon niana ka dako nga global stage.
“Wala namo gidahom nga makatungtong mi sa usa ka global stage aron irepresentar ang Pilipinas. Kining panagdaog dili lang para namo, kon dili para sa tanan nga misalig namo,” gipatik sa grupo human sa ilang gihimong sangka sa entablado.
Gipakita sa SB19 ang ilang world-class ug abtik nga performance sa Allianz Stage, diin gitan-aw kini sa liboan ka mga tagahanga sa personal ug pinaagi sa livestream. Dungan niini, gipasidunggan usab ang grupo sa panggamhanan ug sa Senado tungod sa ilang pagbayaw sa musika ug kulturang Pilipino sa tibuok kalibutan.