Gipasabot sa Department of Trade and Industry (DTI) nga walay gipatuman nga price freeze karon bisan pa sa deklarasyon sa state of national energy emergency sa nasud.
Sumala sa ahensya nga nagpabiling lig-on ang suplay ug presyo sa mga batakang palaliton.
Kini gisundan sa pagpagawas sa Executive Order No. 110 nga nagtumong sa pagpanalipod sa lokal nga suplay sa lana taliwala sa tensiyon sa Middle East.
Lakip usab niini ang pag-activate sa UPLIFT Program nga mohatag og target nga subsidiya alang sa sektor sa transportasyon ug agrikultura.
Matud sa DTI, giuna na sa gobyerno ang pagsumpo sa posibleng pagtaas sa presyo pinaagi sa pagmintinar sa kalig-on sa presyo sa mga produkto nga ginapadala sa merkado.
Dugang pa, nakigpulong ang ahensya sa pribadong sektor, lakip ang 21 ka dagkong manufacturers sa essential goods sama sa sardinas, tinapay, bottled water, instant noodles ug kape.
Gipasalig usab nga dili magtaas sa presyo sulod sa 30 ka adlaw o hangtod Abril 16, ug posibleng i-extend hangtod 60 ka adlaw o Mayo 16.