Gipasalig sa Department of Energy (DOE) ang isgo ang suplay sa enerhiya sa nasud human malampusong nakakuha ang gobyerno og 165 ka milyon ka litro sa lana pinaagi sa Philippine National Oil Corp. (PNOC).
Matud ni Energy Secretary Sharon Garin sa usa ka briefing sa Malacañang, kini nga lakang gihimo aron madugangan ang reserba sa mga kumpanya sa lana, diin gitinguha nga moabot kini sa 318 ka milyon ka litro o duha ka milyon ka bariles.
Ang maong suplay gikan sa Malaysia, Singapore, India, ug Oman, nga nagpakita nga dili lamang sa Middle East nagsalig ang Pilipinas.
Tungod sa maong kalamboan, ang Pilipinas aduna nay stock sa lana nga molungtad og 50 ka adlaw, mas taas tandi sa naandan nga 30 ka adlaw.
Gawas sa lana, gipahibalo usab ni Garin nga nagkuha na ang nasud og Liquefied Petroleum Gas (LPG) gikan sa India, Argentina, ug Canada.
Bisan pa man sa ceasefire tali sa Amerika-Israel ug Iran, gipaniguro sa DOE nga padayon ang ilang pagpangita og nagkalain-laing tinubdan sa enerhiya alang sa seguridad sa tibuok Pilipinas.