Gidemanda karon sa lokal nga kagamhanan ang dinaliang aksyon gikan sa Department of Public Works and Highways (DPWH) ug sa kontraktor niini human makit-an ang hingpit nga pagkadaot sa Malinaw ug Lumayagan Creek sa Barangay Kalasungay, Malaybalay City—nga maoy nag-unang tinubdan sa tubig sa syudad. Atol sa regular nga sesyon sa Sangguniang Panlungsod, gipadayag ni IPMR Datu Jomar Sario nga ang road opening ug excavation alang sa 115-kilometro nga Sayre Highway Parallel Road 2 ang nag-unang rason sa pagkadaot sa maong mga sapa lakip na sa sikat nga Malinaw Falls.
Naalarma usab ang konseho ug si Mayor Jay Warren Pabillaran human mibanlas ang mga debris ug lapok gikan sa maong proyekto ngadto sa natural nga agasanan sa tubig.Giangkon ni Project Engineer Chris Vincent Kurbita sa DPWH-10 nga nakasinati sila og grabeng erosion ug washout sa ilang mga stockpile tungod sa mga serye sa kusog nga ulan ug baha sa lugar.
Sa karon, gisugo na ang kontraktor nga M. Montesclaros sa pag-deploy og mga ekipo aron sugdan ang dinaliang pagpanglimpyo, samtang gihulat pa ang komprehensibong report aron masuta ang kinatibuk-ang gasto ug ang permanente nga lakang para mabalik ang natural nga dagan sa tubig.
Samtang, gisugo na sa DPWH ug sa kontraktor nga M. Montesclaros ang pagmobilisa sa mga ekipo aron sugdan ang pagpanglimpyo ug rehabilitasyon sa naapektuhang lugar. Gipadayag ni Senior Project Engineer Ronald Piñas, nagpadayon karon ang pagtuon sa teknikal nga paagi aron mabalik ang natural nga dagan sa tubig ug mahibal-an ang kinatibuk-ang gasto sa rehabilitasyon.
Gilauman nga mapasa sulod sa semana ang komprehensibong report ngadto sa top management aron masugdan ang mas dako ug permanente nga mga lakang sa pagpasig-uli sa Malinaw Falls ug sa mga naapektuhang sapa sa Kalasungay.