Giduso karon sa Environmental Management Bureau o EMB Region 10 ang pagpasaka og Notice of Violation batok sa nagpatuman sa road project sa Malaybalay City human masuta nga nag-operate kini nga walay Environmental Compliance Certificate o ECC.
Atol sa regular nga sesyon sa Sangguniang Panlungsod, gibutyag ni Bukidnon Provincial Environmental Monitoring Unit OIC Abdulhamid Batugan nga gawas sa pagka-walay legal nga dokumento, nakalapas usab ang maong highway project sa Republic Act 9275 o Clean Water Act tungod sa pagbabag sa natural nga dagan sa tubig. Base sa joint inspection, seryosong kadaot sa biodiversity ang naangkon sa Malinaw Creek nga maoy nag-unang tinubdan sa tubig sa syudad.
Tungod niini, gimanduan sa EMB ang dinaliang slope stabilization aron mapugngan ang padayong pagdahili sa yuta o soil erosion sa dapit. Sa pagkakaron, ang City ENRO sa Malaybalay ug ang BENRO nagpadayon na sa pakig-alayon sa DPWH ug sa kontraktor aron mapahamtang ang tukmang multa ug silot tungod sa giingong gross negligence o grabeng pagpabaya sa kinaiyahan.