Gipasiugda sa City Disaster Risk Reduction and Management Office o CDRRMO sa Malaybalay City ang pagpatuman sa clearing ug trimming operation sa mga delikadong kahoy aron malikayan ang posibleng disgrasya, human sa pagkatumba sa dakong Golden Trumpet Tree atbang sa Bukidnon National High School niadtong Oktubre 19.
Sa pakighinabi sa Bombo Radyo Malaybalay, gibutyag ni CDRRMO Operations and Warning Division Chief Arian Johnson Caga-anan nga adunay programa ang ilang buhatan sa pagputol sa mga kahoy nga nameligro nang matumba, ilabina sa mga lugar nga daghang tawo ug motorista.
Apan giklaro ni Caga-anan nga dili basta-basta mahimong putlon ang mga kahoy tungod kay kinahanglan una ang cutting permit gikan sa hingtungdang ahensiya ug koordinasyon sa Department of Environment and Natural Resources o DENR.
Dugang niini, kinahanglan usab ang koordinasyon sa BUSECO ug City Engineering Office aron masiguro ang kaluwasan sa operasyon, ilabina kon adunay mga linya sa kuryente duol sa kahoy.
Gipasabot usab niini nga ang kusog nga ulan mahimong makapahumok sa yuta ug makapahuyang sa pagkakupot sa mga gamot sa kahoy, nga posibleng hinungdan sa pagkatumba niini.
Sa laing bahin, giawhag ni Caga-anan ang publiko nga ireport ang mga delikadong kahoy sa ilang lugar pinaagi sa CDRRMO hotline nga 0917-827-6117 aron malikayan ang posibleng kadaot sa kinabuhi ug kabtangan.