Posibleng sugdan sa umaabot nga mga semana sa House of Representatives ang bulag nga imbestigasyon sa ₱319.33 milyong remittances gikan sa China ug Hong Kong nga nadawat sa Cale88 Foods Corporation, kumpanyang gilangkit kang Atty. Manases “Mans” Carpio, bana ni Bise Presidente Sara Duterte.
Matud ni Bicol Saro Party-list Representative Terry Ridon, susihon ang gigikanan, katuyoan ug mga nakadawat sa maong mga transaksiyon nga nahisgutan sa impeachment trial sa bise presidente.
Gibutyag ni Ridon nga gikonsiderar usab sa mga kongresista ang pagpasaka og resolusyon aron imbestigahan ang posibleng kalambigitan sa mga pro-China propagandists ug mga tigpaluyo sa pamilya Duterte.
Samtang, giingon ni Ridon nga namatikdan niya ang susamang mga baroganan sa pipila ka tigdepensa sa pamilya Duterte ug sa China, nga angay usab susihon sa Kongreso.
Wala pa magpagawas ang Kamara og pormal nga iskedyul ug pagtudlo sa komite nga manguna sa bulag nga imbestigasyon sa remittances sa Cale88.