Gipasalig sa Department of Labor and Employment (DOLE) Bukidnon Provincial Field Office ang pagtabang sa mga trabahanteng posibleng maapektuhan sa grabeng kainit sa panahon, ilabina ang mga delivery rider ug construction worker.
Sa pakighinabi sa Bombo Radyo Malaybalay, gipadayag ni DOLE Bukidnon Provincial Director Charlton James R. Busa nga naghulat pa sila sa opisyal nga labor advisory sa national office kabahin sa heat index, lakip ang posibleng pagsuspenso sa trabaho kon moabot sa 42 degrees Celsius ang heat index, subay sa ipagawas nga mga panudlo.
Gikumpirma ni Busa nga wala pa sila makadawat og reklamo o report sa mga trabahanteng napugos sa paghunong sa trabaho tungod sa grabeng kainit sa Bukidnon.
Dugang pa niya, andam usab ang ilang opisina nga motabang sa mga trabahanteng makaangkon og work-related injuries o sakit pinaagi sa koordinasyon sa Employees’ Compensation Commission (ECC).
Sa laing bahin, giawhag ni Busa ang mga trabahante ug employer sa Bukidnon nga moduol sa ilang opisina kon adunay reklamo o kabalaka kalabot sa kaluwasan, kahimsog ug kahimtang sa trabaho.