Nagtaho ang Department of Migrant Workers (DMW) nga daghang mga overseas Filipino workers (OFWs) ang nawad-an sa ilang trabaho tungod sa gubat sa Middle East.
Sa usa ka press briefing kagtahapong adlawa Abril 17, gikumpirma ni DMW Undersecretary Jainal Rasul Jr. nga ang uban sa mga OFW permanente nga nawad-an sa ilang trabaho samtang ang uban temporaryo nga mihunong sa pagtrabaho.
Tungod niini, ang ahensya naghatag og tabang sa mga apektadong overseas workers ug gipasimple ang proseso sa aplikasyon aron makakuha og pinansyal nga tabang nga nagkantidad og $200 o katumbas sa ₱12,100, nga maggikan sa AKSYON Fund sa ahensya.
Aron maka-avail sa cash aid, ang mga apektadong OFW kinahanglan lang nga mosumite sa ilang request for assistance form, kopya sa passport, pruweba sa trabaho sa gawas sa nasud sama sa kontrata, visa, labor card ingon man pruweba sa pagkawala sa trabaho o pagkabalda sa trabaho sama sa sertipikasyon gikan sa amo, payslip, notice of termination, visa cancellation kung aduna man, self-declaration sa mga apektadong OFW, sertipikasyon sa komunidad sa mga Pilipino, ug uban pa.
Samtang, si DMW Secretary Hans Leo Cacdac nagtaho nga adunay kinatibuk-ang 6,706 ang na-repatriate, diin 5,023 niini ang mga OFW samtang 1,343 ang ilang mga dependent, adunay usab 340 ka mga turista ug uban pang mga Pilipino sa gawas sa nasud.
Ang pinakadaghang ihap sa mga na-repatriate gikan sa Dubai, gisundan sa mga nangabot gikan sa Kuwait, Abu Dhabi, Qatar, Bahrain, Riyadh, Al Khobar, Israel, Jeddah ug Oman.
Gawas niini, adunay dugang mga OFW gikan sa Middle East nga gilauman nga moabot sa nasud ugma ug sa sunod semana.