Babaye nga misulay pagpasulod og ilegal nga droga sa BJMP CDO, dakpan!

Balhog sa bilangguan ang usa ka 34-anyos nga babaye nga giila sa alyas nga “Honelyn” human makuhaan og ilegal nga droga sulod sa BJMP Compound sa Barangay Lumbia, Cagayan de Oro City.

Ang suspek, nga residente sa Bukidnon, mibisita sa pasilidad apan nadiskubrehan sa mga personnel sa BJMP ang mga kontrabando nga gitago sa iyang lawas pinaagi sa gihimong body search. Moabot sa 12.5 gramos sa gidudahang shabu ang narekober nga adunay Standard Drug Price nga ₱82,960.

Lakip sa nakuha gikan niini ang tulo ka sachet sa droga, aluminum foil, improvised tooter, ug uban pang mga paraphernalia.

Sa pagkakaron, ang suspek anaa na sa kustodiya sa kapulisan alang sa pagpasaka og tukmang kaso kalabot sa pagsupak sa balaod batok sa ilegal nga droga.