Nagpagawas ang Department of Justice – National Prosecution Service (DOJ-NPS) og resolusyon niadtong Marso 3 nga nagrekomendar sa pagpasaka og dugang mga kaso batok kang Guo Hua Ping o Alice Guo ug sa iyang mga kauban tungod sa paglapas sa Anti-Dummy Law.
Kini may kalabotan sa operasyon sa 3LIN Q-Farm Inc. sa Pangasinan.
Ang mga Guo giakusahan sa pag-simulate sa minimum capital stock aron ipakita nga lehitimo ang korporasyon.
Sumala sa imbestigasyon, ang mga “dummies” o peke nga mga identidad giingong gigamit sa pagpalit og yuta sa Pilipinas, nga gidili alang sa mga langyaw ubos sa balaod.
Ang grupo sa sinugdanan gipasakaan og pito ka ihap sa pagpalsipikar sa mga dokumento apan ang kaso sa paglapas sa Anti-Dummy Law gibasura sa DOJ.
Ang NBI-Dagupan District Office (NBI-DADO) nagsang-at og Motion for Reconsideration human sa inisyal nga pagbasura sa kaso.
Ang NBI miingon nga kon ang kaso ibasura tungod lang kay ang yuta napalit sa wala pa ma-isyu ang Articles of Incorporation, mahimo kining gamiton nga lusot sa ubang mga malapason sa balaod aron malikayan ang silot.
Dugang pa niini nga ang peke nga nasyonalidad gigamit aron matagamtaman ang mga katungod ug pribilehiyo nga magamit lamang sa mga lokal nga korporasyon o mga Pilipino.
Gidayeg ni NBI Director Atty. Melvin Matibag ang dedikasyon sa mga ahente sa NBI-DADO sa hingpit nga imbestigasyon niini nga kaso.