Nadiskobrehan sa Commission on Elections o Comelec ang mga pre-sheeted ballots nga gi pang-apod-apod sa 36 sa 48 ka polling precincts Maluso, Basilan.
Tungod sa maong insidente, nag-imprinta pag-usab ang komisyon og mga balota sa National Printing Office nga kinahanglan ipadala sa maong lugar una pa mapadayon ang botohan.
Matud ni Comelec Chairman George Erwin Garcia, bisan pa sa mga insidente ug aberya, kasagarang malinawon ang nagpadayong BARMM Parliamentary Elections.
Apan gikondena sa Comelec ang mga insidente sa pagpamusil sa Cotabato City nga miresulta sa pagkamatay sa upat ka tawo ug pagkasamad sa 19 ka indibidwal.
Bisan pa niini, nagpabilin sa 80 porsyento ang target voter turnout sa Comelec alang sa unang BARMM Parliamentary Elections.
Matud ni Garcia, makita gihapon nila ang determinasyon sa mga residente sa Bangsamoro nga mogawas sa ilang mga panimalay ug mobotar bisan pa sa init nga panahon ug mga insidente nga mahimong makapahadlok kanila.