Nanawagan ang China sa Iran ug Estados Unidos nga magpugong sa ilang mga lihok ug ipadayon pag-usab ang diplomatikong negosasyon tali sa duha ka nasud.
Gipahayag ni Chinese Foreign Minister Wang Yi ang maong panawagan atol sa iyang pakighinabi kang Iranian Foreign Minister Abbas Araqchi sa Beijing niadtong Miyerkules.
Gidasig niya ang Tehran ug Washington nga mobalik sa Islamabad memorandum ug magpadayon sa substantive consultations.
Gihangyo usab ni Wang ang tanang partido nga mohimo og mga lakang aron maabli pag-usab sa labing dali nga panahon ang Strait of Hormuz, aron mapadayon ang kalig-on sa international energy transport ug supply chains.
Gipasidan-an usab niya nga dili gusto sa China nga mokaylap pa ang tensiyon sa rehiyon ngadto sa Yemen ug Red Sea.
Matud ni Wang, kinahanglan usab nga matukod pag-usab ang negotiation mechanism base sa mga kasabutan nga nakab-ot na kaniadto.
Ang panawagan sa China gihimo usa ka semana sa wala pa ang gipaabot nga panagkita ni Chinese President Xi Jinping ug US President Donald Trump, diin lakip sa mga hisgutan ang Iran ug ang financial links niini sa China.