Gihulagway sa Taiwan ang China nga hipokrito ug tinuod nga hulga sa seguridad human sa nahimong pamahayag sa top diplomat sa Beijing didto sa Munich Security Conference.
Kini ang nahimong tubag ni Taiwan Foreign Minister Lin Chia-lung sa pakigpulong ni Chinese Foreign Minister Wang Yi, diin giakusahan ni Wang ang ubang mga nasod nga mosulay kuno sa pagbulag sa Taiwan gikan sa China. Hugot nga gipanghimakak ni Lin ang giingon ni Wang nga gitahod sa Beijing ang kalinaw ilalom sa mga prinsipyo sa U.N. Charter.
Dugang pa sa opisyal, ang mga aksyon sa China nagpakita og “hegemonic mindset” nga dili motakdo sa ilang mga pulong. Gipahinumdom usab sa Taiwan nga base sa kasaysayan ug international law, ang soberanya sa isla wala gayod nalakip o napasailalom sa People’s Republic of China.
Kahinumduman nga nagpahigayon og dako nga war games ang militar sa China duol sa Taiwan niadtong miaging Disyembre, samtang nagpadayon usab ang matag adlaw nga operasyon sa ilang mga pwersa libot sa isla.