Hingpit nga gipanghimakak ni Senate Minority Leader Alan Peter Cayetano ang alegasyon ni Senador Panfilo “Ping” Lacson nga adunay mga “ghost projects” sa Taguig ug gihagit kini nga magpagawas og ebidensya aron pamatud-an ang maong akusasyon.
Sumala kang Cayetano, balik-balik nang gisusi sa nagkalain-laing ahensya sa gobyerno ang mga proyekto sa Taguig apan wala kunoy nakit-ang ghost projects.
Matud pa sa senador, naghimo usab ang iyang opisina og kaugalingong beripikasyon human migawas ang mga alegasyon sa korapsyon sa mga proyekto sa gobyerno.
Regular usab matud pa nilang gisusi ang kahimtang sa mga proyekto aron masiguro nga nahuman kini ug mahatagan og pondo ang mga wala pa mahuman.
Gipasabot ni Cayetano nga ang “ghost project” mao ang proyekto nga gibayran sa gobyerno apan wala gayod matukod o mapatuman.
Gihangyo usab ni Cayetano ang Department of Public Works and Highways o DPWH, ubos sa pagpangulo ni Secretary Vince Dizon, nga sugoon ang tanang district engineers ug, kon mahimo, ang mga local government units o LGUs, nga magkuha og mga litrato ug magdokumento sa tanang flood control projects.
Dugang pa, nga pinaagi niini mas dali nga mailhan kung adunay mga proyekto nga wala mapatuman.