Gi-akusahan ni Senate Minority Leader Alan Peter Cayetano si Senador Panfilo “Ping” Lacson nga giingong nagsunod lamang sa dikta sa kasamtangang administrasyon, taliwala sa nagkainit nilang panaglalis bahin sa flood control scandal ug impeachment trial ni Vice President Sara Duterte.
Sumala ni Cayetano nga adunay giingong “amo” si Lacson ug ang mga aksyon niini batok kaniya kabahin lamang sa mas dakong plano sa administrasyon.
Giakusahan usab niya si Lacson nga gigamit aron dili ang administrasyon ang mabasol sa mga isyu nga may kalabotan sa impeachment ni Duterte ug charter change.
Dugang pa ni Cayetano, posible usab matud pa nga adunay mga kaalyado sa administrasyon nga nagtinguha nga mapahawa si Duterte tungod sa taas niini nga kahigayunan nga modaog sa umaabot nga eleksyon.
Giangkon usab sa senador nga ang pipila ka mga pulitiko, lakip na si Lacson, giingong gisa-aran og posisyon kung ma-impeach ang bise presidente.
Samtang, giinsistir ni Cayetano nga mas angay unta nga tutukan ni Lacson ang imbestigasyon sa giingong flood control scam ug uban pang alegasyon sa korapsyon kaysa sa impeachment trial.