Giinsister ni Senador Francis “Kiko” Pangilinan nga dili lamang racist ug makainsulto ang AI-generated video sa state-owned China Daily nga naghulagway sa mga Pilipino isip mga unggoy, kundili kabahin usab kini sa giingong propaganda sa Beijing aron pahinayon ang bisa sa 2016 Arbitral Award nga mipabor sa Pilipinas sa isyu sa West Philippine Sea.
Sumala ni Pangilinan nga samtang gisaulog ang ika-10 nga anibersaryo sa arbitral ruling, mas gipakusgan matud pa sa China ang pagpakaylap sa sayop nga impormasyon aron kuwestiyonon ang desisyon sa international tribunal.
Matud ni Pangilinan, padayon gihapon ang China sa pagpakaylap sa mga bakak kalabot sa isyu sa West Philippine Sea.
Una nang gikondena ni Pangilinan ang maong AI-generated video ug gihangyo ang Beijing nga tangtangon kini dayon, mangayo og pasaylo sa publiko ug panubagon ang mga responsable sa paghimo niini.
Sa maong video, makita ang usa ka unggoy nga nagsul-ob og Barong Tagalog samtang nagkanta og videoke ug nagbasa sa giingong script gikan sa Estados Unidos ug Japan.
Gipakita usab niini ang karakter nga gibombahan og water cannon, nga giingon ni Pangilinan nga klarong nagtumong sa kanunay nga paggamit sa China Coast Guard og water cannon batok sa mga barko ug mangingisdang Pilipino sa West Philippine Sea.