Nadakpan sa mga otoridad ang usa ka lalaki nga giilang Top 8 Regional Most Wanted Person samtang anaa kini sulod sa Hall of Justice sa Tubod, Iligan City niadtong milabayng adlaw ning kasamtanagang tuig.
Ang suspetsado nga si alyas “Omar,” 34-anyos ug residente sa Kauswagan, Lanao del Norte, nasikop pinaagi sa hiniusang pwersa sa Balo-i Municipal Police Station ug Police Regional Office 10 atol sa iyang pagtambong sa usa ka court hearing.
Nasayran nga wala magdahom ang suspek nga aduna kiniy pending nga warrant of arrest alang sa kasong murder nga gi-isyu niadtong Mayo 9, 2024, ubos sa Criminal Case No. 23-28495 nga walay gitugot nga piyansa.
Ang maong kaso nag-ugat sa nahitabong pagpamusil-patay sa usa ka 20-anyos nga biktima niadtong Hunyo 24, 2023, didto sa Brgy. Pacalundo, Balo-i.
Sa kasamtangan, anaa na sa kustodiya sa Balo-i MPS ang suspek samtang gipangita pa sa kapulisan ang upat pa niya ka mga kauban nga nalambigit sa maong krimen.